توهان - قصيدة للشاعر /محمد أبو زيد الأسيوطي

[محمد أبو زيد]

توهان

للشاعر // محمد أبو زيد الأسيوطي

بعد لفك في الشوارع

ليل نهار

بين حواري اليأس

وبيوت الدموع

وأنت شايل فوق جبينك

إنكسار

وأنت جارر كوم أسى

وجبلين خضوع

واللي يسقط من همومك

في أنتظار

عودتك ساعة الرجوع

وأنت عريان

م الأمان

بين أيديك عكاز

هشيم

يهوى بيك ف الانهزام

جوه بير

ضلمة وعتـيم

كل ما تحاول تقوم

الهموم

تبرك عليك

تشتريك

من غير تمن

هوه ده حالك

يا قلبي

وأنت محروم

من وطن

مش لاقي لك أي بر

والأمر

لو تموت يحرموك

حتى الكفن

والزمن عمال يمر

وأنت بتصلى بخشوع

في المساجد

لسه زاهد

ع الكلام

تحت أقدامك تراب

عايزك تجاهد

كل ذرة فيه حرام

لو تلمسك

وأنت مهزوم

جوه سجنك

ألف صمت بيحبسك

كل خطواتك عدم

والندم بيموتك

وإما تتلغبط مسائلك

يصحى عقلك

تاني فيك

ويناديك

صوت ضميرك

اللي مات

من الآهات

السكات بيسكتك

رغم أنفك

يشتري ويبيع

عواطفك

ضعفك المحفور

في وصفك

يفترش لك سكتك

تيجي تخلع هدمتك

ولا تنفض من غبارك

يملي حواليك

دنيتك

تجري تهرب تستخبي

جوه دارك

تنزع الهم اللي

لابسك

تنفض الأحزان

تحاوطك

تجري تسكن جوه نفسك

تلقي يأسك

يطردك

تقفل الأبواب عليك

تستعيذ

تتفتح شبابيك مهانة

بتعبدك

وأنت تايه

لسه مش واخد قرارك

موت بخوفك

ألف ليل م الهم

ضيفك

فوق سريرك

يرسم الأحزان

مصيرك

يرمي خيرك بره

بابك

أمتي يا قلبي اللي شارد

تطوي سكة اغترابك

فوق كتابك

تبتدى تكتب حروفك

فوق سطور

الإنسانية

حبرها من دم

قلبك

مش بحبك

وأنت فارد سرب خوفك

والكلام ميت في جوفك

مر ريقك

أمته ضيقك

ينسي شكلك ينسي طيفك

تزرع الأحلام

بأيدك

تبتدي

تاخد قرارك

نفسي أشوفك

والأمل شمس في نهارك

يا ترا تقدر

يا قلبي من جديد

تعلن وجودك

ولا هفضل مستخبي

بين دموعي و اعتذارك

يا ترا تقدر

تغير سكتك

وتعيد مسارك

يا ترا تقدر يا قلبي

ولا أعلن انتحارك

شكرا لكم وتحياتي

الشاعر / محمد أبو زيد الأسيوطي

[بنان دركل]

والله اللهجة المصرية رائعة وقريبة من المتلقي بشكل حميم جداجدا
كنت محظوظة بمروري هنا
بنت الشام

[ظميان غدير]

نعم اللهجة المصرية سهلة وناعمة على الاذن

تحيتي لك وتثبيت

ظميان غدير

[الشاعر لطفي الياسيني]

بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين
تحية الاسلام
جزاك الله جنة الفردوس الاعلى التي اعدت للمتقين

[محمد أبو زيد]

شكرا جزيلا لكل من مر بالقصيدة
تحياتي للجميع

[محمد أبو زيد]

ربط للقصيدة علي اليوت يوب