ذكريات عيد الأم
وحشتني يا امه الضحكة
وخجل كان بان ف عيوني
فاكرة ساعة ما سالتك
من فين يا امه جبتوني ؟
****
ضحكتي ضحك ملايكة
وقلتي وبضحكة صافية
والناس نعسانة و نايمة
علي باب جامع لقتوني
****
وأنا ف تعليمي ودراستي
حبيت بنت ف مدرستي
شبه القمر في الصورة
ما شفتش غيرها عيوني
أحلا هدومك ولبستي
ومن أهلها وخطبتي
ليَّا احلا عروسة
بس أخلص دراستي
واستلم شغلي ووظيفتي
أتجوز وتهدي شجوني
****
نجحت وخدت شهدتي
طب فين شغلتي ووظيفتي
هاجج وسايب البيت
نايم علي عتبة جامع
ويَّا شهاداتي وخيبتي
يمكن يرموا لي وظيفة
أهلي اللي كانوا رموني
