سمكة حديدية

إحصائياً، أغلب النساء السوريات بتعاني من فقر الدم بالحديد، بالواقع أغلب نساء العرب بتعاني نقص الحديد، وهي مشكلة عالمية مانها بس عربية. بسبب الحيض المرأة بتفقد حديد باستمرار. والنساء اللي بتعاني غزارة الدورة الشهرية مهدّدة أكتر من غيرها لفقدان الحديد بوقت الحيض.
وهي مشكلة مانها خاصّة بالنساء فقط، لكنها بنفس الوقت عامّة عند كل النساء تقريباً. وكمان فقدان الدم البطيء والمزمن جوا الجسم ممكن يعمل نقص حديد، متل مشاكل القرحة وفتق الحجاب الحاجز، وبعض مشاكل القولون والمستقيم… حتى الاستخدام المبالغ فيه لبعض مسكّنات الألم ممكن يعمل نزيف بالجهاز الهضمي، متل الإفراط باستعمال الأسبرين مثلاً… كلها مشاكل ممكن تعمل نقص حديد وهي ممكن تكون بداية لطريق فقر الدم.
في كتير من الحلول اللي ممكن نعملها لتفادي نقص الحديد، متل أكل الأكلات اللي فيها حديد كتير، أو الطبخ بأواني من الحديد الزهر… لكن مشكلة هالأواني إنو جليها صعب، وبتصدّي بسرعة إذا نقعناها بالمجلى، وما بتنجلى بالجلاية، وما بصير يلمسها صابون.
لهالسبب في شخص كندي اخترع من 14 سنة شغلة من حديد بشكل سمكة بتساهم بتعويض نقص الحديد. اختراع هالشخص اسمو سمكة الحظ الحديدية Lucky iron fish أو بالألماني glückbringender eiserner Fisch وهو سمكة من الحديد الزهر، بتنغلى مع الطبخة لمدة عشر دقايق، أو بتنغلى بالمي اللي حينطبخ فيها لمدة عشر دقايق… وهيك بتقدّم 75٪ من الحاجة اليومية للشخص أو للعيلة من الحديد.
بتعرف\ي شو بيعمل نقص الحديد بالجسم؟
الحديد هو المكوّن الأساسي بكريات الدم الحمرا، اللي بتعطيها اللون الأحمر وبتساعدها على نقل الأوكسجين… نقص الحديد بيعمل نقص أوكسجين بالجسم، أول آثاره هي الشعور المفرط بالبرد، التعب العام، وأخطر آثاره هي نقص تغذية الدماغ بالأوكسجين، يعني بطئ تفكير ونسيان كتير ومشاكل تانية.
السمكة الحديدية سعرها 45 يورو وبتبقى شغالة خمسين سنة وموجودة على أمازون وغيرو… وصغيرة نسبياً، طولها 7 ونص سم ووزنها 200 غرام… إذا بتعرف حدا عندو مشاكل نقص حديد، يمكن هي أفضل هدية تهديه ياها بعيد ميلادو.