انواع الحرد

#سردة حلبية ..
"الحردانة "

من المعروف قديماً أن #المرأة حينما كانت ( #تحرد ) وتترك بيتها بسبب خلاف مع زوجها ...ترتدي ملحفتها السوداء .. وتضع لوازمها وملابسها في بقجة ..وتضع #البقجة على رأسها ..وتسير نحو بيت #اهلها وهي تبكي و تشهق وتتنهنه ...
وتمسح انفها بين الفينة والأخرى .
يستقبلها والدها : خير يا بنتي ..؟؟
تبدأ بالمعزوفة المعتادة :
( قلّعني ...وقلي ينعل ابوكي ...وقللي امك ميشحه ...!!
وهنا تنتفض امها : انا ميشحه ..؟؟ يا مأنشح ..؟!!
وقللي : عيلتك ما بتعلّق على #صرمايتي ...!!
يقول لها ابوها :
( هيك لكان .. وسكتتيلو ..؟؟!! )
ردت : له يا يوب .... يسبّك واسكتلو ؟؟
قلتلو : فشرت بعينك انت و #عيلتك .المشرشحه .
عيله متل قفا الكيله ..( فيتهلل وجه والدها )
واذا ابوك #البصل وامك #الثوم ...منين بدا تجيكن ريحة الطيبه ..؟؟!!
قام وسلخني هداك الكف على بنت ادني يا يوب صرعني ...
ورفسني هديك #الرفسه دعكلني ..ولباب الدار وصلني ..
وقلي قومي انقلعي ..واستلمي درب اهلك ..
ولا تجي .. من عندن حتى تتربي .... عمهلك ..)
يرد الأب بغيظ :
( هيك طلع معو هلأ بن الحرام .؟؟ .. وهيك صار الكلام ..؟؟
قعدي بنتي قعدي .. مالك رجعه لعندو ..
انتي ببيت اهلك .... كلي وارفسي #السفره برجلك ..
اول يوم رفست البنت السفرة ..( لم ترفع الصحون ) !!
في اليوم التالي لمًت السفرة ...
وبعدها قامت بجلي اواني السفره ...
وبعدها نزلت على #ميدان العمل في البيت من كنس ومسح وتعزيل ..
وكل يومين حفلة غسيل .... وشيل اذا بتشيل ..!!
وتلت عليها امها قانون الحرد :
ممنوع حدا يشوفك من اهل الحاره ...
واذا شافوكي بتقليلن : جيه لعند اهلي زياره ...!!
.وبعدين لا طلعه ولا فوته .. ولا دواره ...
وبعدون ..
ممنوع تحكي عالتلفون ..
او تحطي على وجك خط ولالون ..!!
وتشعر المستوره انها وقعت في ورطه ...وان حردها كان غلطه ...
وبعد شهر .. يتدخل اهل الحول والطول من وجهاء البلد ..
فيعقدون جلسة صاخبة في بيت والدها ....
وصوت ابوها يلعلع .. وصوت زوجها يبعبع
وهي قاعدة على الدرج ..تنتظر الخلاص والفرج ..
وبعد الصراخ والنقاشات ..تهدأ في الغرفة الأصوات ..
وتعود في النهاية الى بيتها بعد العصر ....
ويبدؤون نقطه من اول السطر ...

***

اما حرد آخر زمان ...
تأتي الزوجة الى بيت أهلها .. تهدد وتصيح ..
وفي يدها الموبايل واصابعها نازله كبس بالمفاتيح .. .. ..
وهي وزوجها .. نازلين ببعضن بالكتابه ..سب وتجريح ...
يسألها ابوها : خير يا طير ..؟؟
فتقول له : يا بابا ..منين بدو يجي الخير ..طول نهار ماسك #الموبايل ..من وحده لوحده وانا قاعده جنبو ( متل كلبه ) ولاهو شايفني ولا متعبرني ..
وصار يحكي قدامي مع #البنات عالمكشوف ..
هي عيشه هي ..؟!
فيقول لها ابوها : لا والله موعيشه .
قالت : تركتلو البيت .. خلي صديقاتو ينفعوه لشوف ..!!
قال لها : اتركيه ولا تفكري فيه .. .
واقعدي هون لبينما يرجع لعقلو والله يهديه ..
يمضي اول اسبوع .. وهي تنام عند أهلها نومة الأجير ...بعد ان كانت في بيتها تنام على #السرير .. نومة #الأمير ...
.وتكاد اضلاعها تتكسر من نومة الدشك ..
وتقوم باعمال شاقة في بيت اهلها ..
تجعل الديسك منها على وشك ..!!
.وحين طفح بها الكيل ..استغلت فرصة الهدوء في الليل ...وكتبت له :
( بقا عايز تنساني وتزود حرماني .. انا مش حرجعلك تاني ..!!
فرد عليها :
أيا #جارة لو تعلمين بحالي ...تشرشحت من بعدك يا مالي ويا رسمالي ..
ردت عليه : ما حالك بأحسن من حالي ..يا غزالي ..!!
فيقول لها : اذاً ..تعالي اقاسمك الهموم ...تعالي ..!!
ويحن قلبها .. وتتذكر ملايحه ومحبته لها ..
وكيف قضوا في اللاذقيه شهر عسل بطولو ..
فتقول له :
يا غزالي كيف عني هالبنات الحرام ابعدوك . شتتوا شملي وهجري عودوك ...
تعال وخدني من هون عالسريع ...طقت روحي يرحم ابوك ..!!
قال لها :
جاي لعند ابوكي بكره يا روحي ... قبل صياح #الديوك ..
وفي الصباح طرق الباب .. وهو خائف من السؤال والجواب ..
وهل سيكون هناك عتاب ..؟؟
يفتح ابوها ..فيرى صهره العزيز يتسحسل ..وهندامه مفشكل .. .
ودخلوا ...
قال له عمه : لكان هيك يا منظوم بيطلع معك .. !!؟؟
وليش هالفعل تبعك ؟؟
رد عليه : له يا عمي شي راح ومضى ..وأنا معك ...
واللي بيوجعني بيوجعك ..!!
رد عمه : وهالوضع ايمتى بدو يتغير .فهمني .
تفضل عمبسمعك ..!!
يرد : خلص يا عمي ...اللي فات مات .. ..
حظرت من موبايلي كل البنات .
وما خليت فيو غير الخالات والعمات ..
اش بتريد بعد هيك ياعمي .؟؟ .هات !!
قلو : خود مرتك وافرقوني ... وسبع مباركات ..!
#منقول..