ماء الزهر...بقلم آرا سوفاليان
ماء الزهر...بقلم آرا سوفاليان
ـ نزيل جبلنا ما زهر ـ عنا ما زهر ـ ما عنا ـ ليش الما زهر؟ ـ لولاد جايي عبالون رز بحليب.
ـ مرحبا أسامة ـ اهلاً وسهلاً ـ في ما زهر عندك؟ ـ ما عندي ولا تعذب حالك شكلو مفئود ـ يا سيدي رايح عزب حالي ودوّر.
مرحباً عندك مازهر؟ ـ لا والله بس عندي ماورد ـ ما بيمشي الحال ـ انت ليش بدك ياه؟ ـ عندي مولد وبدي رشّو على روس المعازيم ـ ايه رش ما ورد ـ ما بيمشي الحال لأنو الماورد الصناعي ريحتو واقفة
ـ مرحبا عندك ما زهر؟ ـ لا تعزب حالك مفئود ـ من ايمتا مفئود؟ ـ من زمان مفئود من أول الأزمة ـ طول بالك أنو أزمة؟ ـ مين آل أزمة؟ ـ دخلك هادا البيت يلي فوق الدكان مو ألكن؟ ـ مبلا ألنا ـ مو هادا بلكون الأزمة يلي نزل عليه هاون ـ يرحم بيك هادا هوي ـ كان عليه توم؟ ـ أي كان عليه توم ـ الله يصلحكون كان لازم تفوتوا التوم لجوا مشان ما يدئهون الهاون ـ سيدي أكلنا نصيبنا وهلئ رممناه ومشي الحال ـ الهيئة بسرعة ترمم ـ أي والله ـ انشاء الله ما صار شي غير البلكون؟ ـ لا الحمد لله ما صار شي بس كانت حماتي نايمة عنا وكانت رح تروح فيها وسقيناها كاسة ميّ وحطينالها فيها مازهر وكان بئيان شوي بالئنينة ومن وئتها ما عنا ما زهر لا بالبيت ولا بالمحل ـ ها مشان هيك مفئود ـ شو ئصدك ؟ أصدي الناس صارت عم تستعملو بطاسات الرعبة مشان هيك صار مفئود.
درت كل الحارات يلي حوالينا مشان اشتري قنينة ماء الزهر لأنو الاولاد جاي عبالهون رز بحليب وما مشي الحال وبعدين لئيت حالي بمناطق شعبية وبعيد عن البيت ولئيت دكانة صاحبها ختيار وسألتو عندك مازهر؟؟؟ ألّي موجود...وعطاني قنينة مربعة لابستها الغبرة لبس...ئلتلو بأديش؟؟؟ ...طالع الكزلوك وقرا عليها وألي 60 ئلتلو يا صاحبي ما بدي غشك اليوم الدولار بمية وخمسين وما عاد في حدا يعوضلك ياها بستين ـ ئلي...يا سيدي اذا ربك ما جابها ما في حدا بيجيبها هات 60 وتيسر ...ودفعت وتيسرت...لو ان نص ربع البلد من امثال هذا الرجل لما وصلنا الى هنا
آرا سوفاليان
كاتب انساني وباحث في الشأن الارمني
الجمعة 17 05 2013
arasouvalian@gmail.com
http://im40.gulfup.com/fmuTg.jpg
http://im40.gulfup.com/Q3aB4.jpg
