ازيك يا ابراهيم الحمد لله انا تمام وبخير لكن فى مشكله بسيطه العماره اللى انا ساكن فيها ليس بها كهرباء الا يومين فى الاسبوع والمياه دائما يتم قطعها خاصه يوم الجمعه طول النهار فاضطر ان اشترى المياه وانا مرتبى زى ما انت عارف يدوب يعنى اه
والله يرحمه والدى سابلى قرشين لكن مع دخول العام الجديد انتهوا مصاريف المدارس والدروس الخصوصيه والديون من البقال الى الجزمجى وبعدين نحن فى زمن الثوره الركاد وانتشار الفساد والبلطجه انا حاولت اشترى اتنين بلطجيه لحراسه العماره لكن اشترطوا شرطين الاول الواحد بالف جنيه والثانى يسرقوا العماره
والله يا ابراهيم من يوم ما اشتغلت فى الوظيفه الجديده والهموم فى ازدياداعمل ايه مطالب العيال كتيره الواد ابنى منصور الله ينصره( موس) فى الطلبات اتعلم من والدته نهايته ربنا بيعين المهم انت كويس انا تمام
لكن فيه مشكله تانبه شبكه المجارى اللى حوالينا انفجرت من تلات شهور والى الان لم يتم حلها المسؤولين اكدوا انهم سيجدون حلا خلال يومين ومن ساعتها واكتشفنا فى النهايه ان المسؤول الصغير طلع حرامى وسرق المقاول والمقاول سرق الشركه والشركه سرقت الحكومه والحكومه سرقت البلد
ازى صحتك يا ابراهيم والله انا تمام انا بس كان عندى شويه برد من عشره ايام والحال تغير من برد الى ضغط المشكله انا جالى الضغط مش عارف ازاى تفتكر من ايه يا ابراهيم
الطبيب قالى ان مشكلتى انى حساس حبتين بس مش فاهم يمكن من البرلمان الجديد هو سالنى باختصار انت سياسى طبعا انت عارف انا سياسى على الاخر وبحب امشى جنب الحيط
من كام يوم بيت المعلم سعيد انت عارفه وقع على السكان والمعلم مات تحته الملفات والتحقيقات قالت انه كان حرامى والواد ابنه ورث خمسين مليون والفين فدان ببلاش وعندما حصروا وجردو التركه وحتى يغطوا على النهب من الغفير الى البواب الى المسؤول تم اخذ توقعاتهم وتعهداتهم بعد ما قبضوا المطلوب
المعلم سعيد الله يرحمه فاكره طبعا كانت علاقته حلوه بالحكومه اللى راحت وعمل ثروه زى غيره كان له اصدقاء من امن الدوله والحزب الوطنى المنحل طبعا انت عارفنى بفهم فى السياسه كويس انت عارف الدكتور وهو بيكشف عليه قالى ايه هتندهش
مصر اللى بيديرها امن الدوله مش الحكومه ولا البرلمان طبعا انت عارفنى بفهم قوى فى السياسه قلت له انا عارف وقالى كمان ان الثوره المسلحه معادها قرب والشعب هيقتل فى بعضه طبعا سالته ليه اجاب الرئيس اللى الشعب عايزه امن الدوله مشعايزينه واكتشفت ان امن الدوله يتدخل فى التعينات وخصوصا اعضاء البرلمان
ازيك يا ابراهيم والله وحشتنا يا راجل انت فينك من زمان يا سلام دنيا صغيره بجد
من يوم ما اتوظفت وسكنت فى العماره وكل يوم خناقات على فرن العيش وقدام البقال وعند البنزينه وفى الاتوبيس انت عارف كيلو اللحمه بكام اليومين دول نهايته انا عارف انك بتحبهاش ولا انا
يا سلام عارف الواحد زى ما يكون هتطلع روحه عموما كلها كام شهر واطلع معاش بس ربنا يكرمنى واقبضه فى ميعاده الاسطى محمود قبض المعاش بعد تلات سنين
طلعت روحه والله يا راجل
انت فاكر مصطفى التمرجى مات امبارح الله يرحمه كان ولد عفريت
ا لا تقول انه كان مرتشىا وحرامى وبيساعد ضباط امن الدوله فى التعذيب والله عندهم حق هيتعلموا التعذيب فين فاكر رزق الله يرحمه مات من التعذيب فى المستشفى الميرى فى السيده زينب هوه كان قلقان شويه بس ربنا رحمه ومات انت فاكر الضابط كان اسمه جلال اترقى ساعتها وبقى عقيد زوجته رفعت قضيه تم رفضها من اول جلسه لعيب فى الاجراءات
ازيك يا ابراهيم يا سلام دنيا والله واحشنا يا راجل النهارده فيه اوكازيون لكن فى مشكله بسيطه بييانات الحكومه وطلبات الاحاطه شىء محير قوى ولا بيان او طلب احاطه له اهميه كلهم طلعوا فى الاخر بيهزروا
انت فاكر ان احنا تغيرنا لا يا ابراهيم دى سلسله مطاعم جديده بس بطعم البارود والكدب والخيانه والعماله والموال طويل والقائمه مليئه والوقت لا يسمح
ازيك يا ابراهيم ابنك سالم عامل ايه الله يكرمه خلى بالك منه اصله شقى قوى ولمض طالع زى خليل ابنى لعب امبارح قدام العماره الحمد لله ربنا ستر بس طارق ابن جارنا لطفى رجليه اتكسرت راح المستشفى قالوا له مفيش مكان العمليه زحمه خالص اضطر يروح الخصوصى سالوه هتدفع كام الاول طبعا الوقت ضاع وبعد نصف يوم قرر الطبيب قطع الرجل اليسرى+
والله يا ابراهيم شىء يحزن لكن الحمد لله انا فى حالى سياسى وهادى انت عارف طبعا نظامى من زمان اكره الحال المايل انا قلت له انت عضو بالبرلمان عن دائره الانتقام رد باهتمام البلد اتباعت واحنا كلنا نواب طراطير هايفين على الاخر كل كلامنا فى الفاضى والناس ضاعت والشعب يريد حل البرلمان احنا اتخدعنا
طلبت منه طرطور لابنى سالم يا اخى الواد ده عفريت بيحب يلبس الطرطور ويغنى اغنيه اركب الطرطور
وما بين خداع الحكومه وهبل البرلمان يضيع الشعب الغلبان
الحمد لله انا كويس جدا وام محمود عندها فقر دم والله انا غلبت معاها ومع الاطباء كل ما افسحها تشم هوى تعكر دمى انا والاولاد انا كنت فاكر انه من المواصلات وزحمتها ومن العيش وصغره او من ازمه السولار واللى اخترعوها او بسبب غلاء الاسعار او بسبب الكمين اللى على اول الشارع
انت عارف طبعا ان الحكومه الجديده زى القديمه وانا بصراحه كده مش عارف اغير الجزمه القديمه والله المرتب يدوب لكن اشتريت دوا كحه لخليل ودوا اسهال لسعاد ودوا مغص لرضا ودوا روماتيزم لى
طبعا انت عارف انجازات الحكومه الجديده اللى طبعا هى القديمه اه نسيت اقولك ان الحكومه الجديده استلفت مليار جنيه من مباحث امن الدوله وشويه ضباط يساعدوها فى خراب البلد
انت عارف طبعا انا بكره البنوك لانى ماليش فى التحويش بس استلفت خمس تلاف جنيه عايزينهم منى عشرين انا مش عارف ازاى الحمد لله انا مش ماضى على اى شيكات ام محمود هى اللى موقعه على عدد اتناشر ايصال اصلها كانت ناويه تجيب غساله وبوتاجاز وتصلح السباكه وتركب السيراميك بس ما لحقتشى
والله صعبانه عليه خالص كل اسبوع ازورها فى السجن بنص كيلوا كفته وشوربه فراخ اصلها بتحب شوربه الفراخ خالص زيك تمام بس الواد خليل زعلان لانه الزياره اللى فاتت لقى امه بتعيط ولما سالناها ليه كده بس
كان نفسها فى شوربه الكوارع
ازيك يا ابراهيم وازى صحتك لسه برده بتشرب حشيش ولا بطلت اخبار الدنيا معاك ايه بيقولو انك اشتريت لك تلات فدادين من البنك الجديد خلىبالك انا خايف تعمل زى نواب القروض اه بالمناسبه كانوا بيتكلموا امبارح عن الفلوس المهربه فى البرلمان لكن فى النهايه تم رفض التقرير وحبس الفلاح الصغير وتهنئه الوزير بشم النسيم هتروح فين السنه دى انت والاولاد الاهرامات ولا السندباد
تصور يا ابراهيم ان كيلو اللحمه بقى بسبعين جنيه ومشعارف اجيب لحمه ولا جزمتين فى دماغى لخليل وامه
الحقيقه اننى حاولت ان استغنى عن الطلبات الختاميه فى القضيه وذكرت نفسى بانها خسرانه خسرانه
وحياتك يا ابراهيم لما تزور النبى ابقى ادعيلى هناك وادعى على اعضاء البرلمان الجديد كلهم نصابين شله حراميه والشعب اتخدع فيهم من شهررحت لواحد منهم دقنه اطول من ديل الحمار انت عارف طبعا مشكله الشارع لا مجارى ولا كهرباء ولا ميه حلوه اتصدق بالله انا بشترى الميه الحلوه الجركن بتلاته جنيه واكتشفت انها لا حلوه ولا حاجه حتى الواد ابنى جالوا اسهال المهم عارف سياده النائب بكل بساطه وعدنى بطلب احاطه واكتشفت انه طلب منى توقيعات وجمعتله التوقيعات رد قال تمام انت كده فى السليم ونهايه الموضوع عشان ما طولشى عليك شوفته تانى يوم رد بكل بساطه وقالى انشاء الله بكره كله هيتصلح وبكره ده شكله مش جاى طبعا هتسالنى عملت ايه قدمت طلب لرئيس الحى ورئيس الحى قدمه لرئيس مجلس المدينه ورئيس مجلس المدينه قدمه للمحافظ والمحافظ قدمه لسياده الوزير وسياده الوزير قدمه لعربيه الذباله
ازيك يا ابراهيم وازى صحتك وصحه الاولاد انشاء الله يكونوا بخير اخبار مزاجك ايه انا والله مشعارف مزاجى مشمظبوط ليه اليومين دول موضوع الدستور ده معكنن عليه عايزينه سلطه باللمون حسب مزاج الناس اياهم عارف يا ابراهيم مشكله مصر ايه ان اهلها مشعارفين قيمتها
تصدق ان اكتشفت ان البلهارسيا وفيروس سى والحمى القلاعيه وانفلونزا الطيور من شروط معاهده كامب ديفيد الناس مش عارفه حاجه العمليه بسيطه خالص وحل المشكلات اسهل من شرب الشاى لكن الناس دايما بتصعب المسائل على نفسها هتقولى ازاى اقولك يا سيدى الامريكان اللى هربوا يرجعوا تانى والناس تشتغل بضمير والبرلمان يتغير والحكومه تلعب عشرتين كوتشينه فى وسعايه ميدان التحرير والفلول يحرقوا المحصول والاخوان يكتبوا عقد بيع للبلد والسلفيين يشكلو فريق كوره جديد بدل فريق بورسعيد المغضوب عليه وشارع الهرم يبنوا مكانه وزاره الماليه الجديده وكل مسؤول يساعده راقصه خمس نجوم
والله الحلول كتيره بس الشعب مش فاهم حاجه وخلى بالك فيفى عبده من السبعه الكبار واضعى الدستور
انت تعرف ان زميلنا سعد باع دهب مراته اه والله عشان ياكل هيعمل ايه والواد منصور ابنه كان عيان جامد والدكاتره الله يسترهم عملوله عمليتين البواسير والمراره ولما طلع من المستشفى الحكومى طبعا مات منصور اصل الدكاتره وهما بيعملوا له العمليتين طمعوا فى الكلى الشمال كانت تمام وسليمه وطمعوا فى فى حته من القلب والله يشكروا ريحوه من الدنيا وبلاويها
كل سنه وانت طيب يا ابراهيم انشاء الله الدنيا بخير ومصر بخير انشاء الله هيحكمنا رئيس محترم عنده رؤيه سياسيه محترمه واهم شىء عنده هموم المواطن اليوميه خلى بالك اوعى تنتخب اى مرشح بيتكلم كتير عن الوطن والوطنيه والمواطن ورفاهيته وحل الازمات الداخليه لانه كداب انتخب المرشح الغبى المتخلف العبيط عارف ليه عشان هو ده المرشح الوحيد اللى ممكن يصنع المجد للوطن وتنتشر معه المبيدات المسرطنه
انت متاكد من الخبر اللى قولت لى اول امبارح انا حاسس انه حقيقى والله اليومين دول مبشاهدشى التلفيزبون كلهم كدابين لكن ممكن الخبر يكون حقيقى عارف لو حقيقى هتبقى سوده خالص يعنى فى حرب اهليه قادمه فى مصر وبعدين نلاقى اسرائيل وامريكا وكل الحبايب بيفطروا معانا فول وطعميه وفيه قرنين فلفل اوعى تنساهم ام صابر سرقتهم من عند جارتنا ام بدوى اصل لها عندها قرشين وبتلابط فى دفعهم الاسبوع اللى فاتت سرقت البطه وفرختين وعملت محضر ومفروض نعمل محضر للبرلمان وتحفظ التحقيقات وكله فى البراءه واحد شاى ولمونه اصل عندى برد اليومين دول واكتشفت ان كل القضايا المرفوعه على النظام القديم ناقصه ملح والطبخه باظت منها لله ام بدوى كان لازم تسرق القرنين الفلفل
ازيك يا ابراهيم ايه مش ناوى تزورنا بقى انا عازمك على الغدا يوم الجمعه بس هات معاك كيلوا لحمه لو بتحبها انا حالف ما تدخل بيتى وهات معاك اتنين كيلو تفاح اصل انا والله حلفت على المدام بالطلاق ما يدخل بيتى ولو مش عايز تكلف نفسك تعالى بطولك وابقى هات معاك الاولاد احنا بنروح السجن كل يوم جمعه نزور المدام واهو تغير جو
