الى ابي الحبيب
السلام عليكم يا ابى الحبيب طبعا انت الان فى امس الحاجه لان تعرف اخبار ابنك النجيب خريج جامعه السوربون العريقه
انا الان يا ابى الحبيب ومن تحت كوبرى ابو العلا العريق اعيش فى احسن حال فبعد اكثر من ثلاث سنوات قد كونت منظمه للاعمال الخيريه انا فيها الزعيم فقد كنت قديما لا افهم النظام وكنت للاسف (انضرب على قفايا)فلم اكن امتلك اى شجاعه فى ان اواجه عصابات التسول والسرقه والبلطجه هنا الا اننى وبفضل تاريخك المشرف معى تعلمت فانت من علمتنى الشجاعه (وقله الادب)حين كنت تصحبنى معك الى(الخماره)واشرب انا وانت (كاسين ويسكى)فى صحه (الهيافه) لقد كنت بالنسبه لى المعلم الوحيد والنبيل فقد انفقت على مال الدنيا حتى تخرجت من الجامعه واخطات حين بعت القراطين اللى حيلتنا (بطربه حشيش) لكن انت ندمت وتاسفت لامى وبكيت كالطفل حين ضربتك (شبشبين)على خدك الجميل
عفوا يا ابى انا الان اصبحت زعيما الا اننى احيانا كنت ابكى من شده الجوع والفقر فكان بعض الناس يعطونى رغيف من الخبز وقطعتين جبنه لكنى لم اكتفى بذلك فقد تعرفت على امام الجامع القريب من الكوبرى فوجد منى اخلاقا حسنه وثقافه نادره فقرر ان يعزمنى على الغداء كل يوم جمعه فكنت اذهب لاتناول وجبه دسمه من لحم الضانى
وكنت دائما ما اتسول من الماره وكان الرجل الوسيم (الكباره)يعرفنى وهو مسؤول فى الحزب وكان يعطينى (عشره جنيهات كل اسبوع (الله يستره)الا اننى اكتشفت بعد ذلك ان ابنه (التافه) يشتغل اربع شغلانات وكل شغلانه (بعشرين الف جنيه)
ابى الحبيب اطمئن ابنك بخير لقد تحققت امنيتك فانا الان فى مركز مرموق احسد عليه حتى من ابن المدير التافه لانك يا ابى علمتنى الاستقامه وانا لم انسى لك جهدك وفضلك
لقد عقد مؤتمر فى قاعه محاضرات كبيره عن الاحزاب والعمل السياسى الجديد وحضره مجموعه من اعضاء مجلس الشعب وقد طلبت من احد اعضاء مجلس الشعب ان يسعى لى فى ان اجد وظيفه واطلع (الله يكرمه)على اوراقى وشهاداتى المتعدده وقال لى انه يريدنى ان اذهب مكتبه اتعرف يا ابى لقد ذهبت مكتبه فقال لى بمنتهى السعاده انى هشتغل وهسافر كمان ففرحت جدا وقال كل اسبوع هتسافر المانيا فسالته ليه اجاب بابتسامته المعهوده (هتودى الحاجه دى اللى فى الشنطه السوده دى وتجيب غيرها)واعطانى البيانات الكامله الا اننى يا ابى الحبيب ولانك علمتنى الاستقامه والنبل والحيطه والحذر اكتشفت ان الشنطه السوده دى فيها حشيش ومخدرات عفوا يا ابى مقدرشى اجيب لك الحشيش اللى فيها لانى بعته وعملت منظمه خيريه بفلوسه (واهى ارزاق)
ابى الحبيب لا تغضب من طول غيابى فانا معذور فالعمل فى المنظمه شاق ومتعب لان كل يوم يتعرض اعضاء المنظمه للمناوشات من الشرطه والناس لكن الحمد لله وبفضل التنسيق مع الجهات الامنيه لم يتم القبض على اى حد من الاعضاء المحترمين وزى ما علمتنى يا ابى (اطعم الفم تستحى العين)
الحمد لله يا ابى دلوقتى بقيت كويس جدا وبعد ما اشتغلت شغلانات كتيره من متسول الى بلطجى معلشى انا اسف يا ابى غصب عنى لكن هعمل ايه (_ما باليد حيله) وبعدين انا كسبت كتير من البلطجه دى وبفضل المساعدات التى قدمتها لنا الجهات الامنيه (كسبنا فلوس كتير)
ما تقلقشى يا ابى الناس لسه عندها وهم اسمه الثوره لكن احنا عارفين الحقيقه(مفيش حاجه هتتغير)وكله بيلعب على كله
من اجل ذلك لا تقلق الامور ماشيه مع ابنك تمام
ابى الحبيب بعد ما كنت اهبل وعبيط وبنضرب على قفايا النهارده خلاص بقيت زعيم محترم كمان وعلى فكره انا قطعت الشهادات لانها مبقاش لها لازمه معلشى اعمل ايه انا تعبت قوى فى الاول وما كنتش لاقى اكل حتى العيش الحاف ما كنتش بلاقيه والمره الوحيده والاخيره اللى وقفت فيها على طابور العيش وقعت من طولى من الدوخه وبرده مخدتش عيش لان بتوع التموين (قفشوا)صاحب الفرن بيبيع الدقيق لكن دلوقتى بفضل الله تعالى شوف بيتى فيه ايه كل حاجه اصل انا بقال ليه بيت زى ابن المدير وبقيت البس زيهم عارف انا عندى عشر بدل اتنين مخططين وبفضل التخطيط برده وصلت للى انا فيه بعد العذاب تحت كوبرى ابو العلا تلات سنين
المؤتمر اللى عملوه بتوع الحزب بيقول هيلغوا قانون الطوارىء وده برده كلام جميل عشان نشتغل وما حدش يعارضنا احنا يا ابى بنتعب جامد ومبنعرفشى ننام من خدماتنا للناس
لقد تحققت امنيتك يا ابى وابنك بقى مسؤؤل انت كنت بتتمنى انى ابقى مسؤول واخدم الناس وانا الان اقوم بخدمه الناس افضل خدمه وكله بفضل الله وشنطه الحشيش بتاعت عضو مجلس الشعب
عارف يا ابى حينما كنت صايع متسول نايم من غير هدوم فى عز الشتا تحت كوبرى ابو العلا كانوا بيعملو انتخابات واحد صاحبى معايا تحت الكوبرى قالى روح بتوع الانتخابات بيوزعوا لحمه
والحمد لله لحقت وخدت كيلو كندوز والمرشح قالى (خش بقى يا خفيف انتخبنى)كان راجل طيب قوى يا ابى لما انتخبته ادانى خمسين جنيه بس لقيت راجل تانى (بلحيه )كان زعلان قوى وقالى انت انتخبت الفئات انتخبنى انا عمال واعطانى شنطه فيها تموين زيت وسكر وخير كتير
ولما زاد الانفلات الامنى وومجلس الشعب انعقد وروحت للعضو بتاع الحشيش وبعتها وفتحت المنظمه الخيريه بقيت واحد تانى انشاء الله يا ابى هعوضك واشتريلك فدان ارض ابنك ما زال على عهده معاك ذكى ونجيب ومثقف وصاحب مبدا عمر الظروف ما هتغيروا
النهارده يا ابى عيد الحب وانا بحبكم جدا عارف ايام كوبرى ابو العلا كنت بحب واحده ولما قربت منها اكتر لقيتها تمتلك مائه رقم تلبفون وسته عشر عشيق فكرهت الحب وعيده
اطمئن يا ابى مصر بخير وبكره احلى من النهارده اوعى تصدق الاعلام كلهم كدابين مصر جميله والناس كلها زى الفل بياكلو سمك على البحر ومبسوطين تمام
لا تغضب منى يا ابى انا من تلات ايام رحت عشان اخطب (ازهار)لكن طلعوا ناس طماعين عارف ابوها قال لى ايه(بنتى تضمن لها حياه سعيده)سالته ازاى قال لى (اليوم فيه تلات طقات الصبح عسل وبيض ولبن والغدا لحمه وفراخ والعشا فاكهه ولبن وقشطه باللوز) ولما تعوز فلوس تديها من غير حساب تصدق يا ابى انه طلع (نتن )لكن بفضل تعليماتك زمان رفضت وقلت له(خلى بنتك عندك وابقى جوزها لصاحب مطعم كباب)
بعد الثوره يا ابى كل شىء تمام واللى كان فقير بقى غنى والبركه فى الجهات الامنيه المحترمه والناس بقت حره وكل واحد بقى عارف ياخد حقه ازاى شىء عظيم ان الانسان يحصل على حقه فى لحظات افضل من شغل المحاكم اللى بيطول بالسنين
طبعا انت لسه يا ابى بتسمع نشره الاخبار فى الراديو كالعاده وانت نايم بجوار الجاموسه والجاموسه طبعا بتسمع معاك انت علمتها تسمع الراديو خلى بالك الاخبار ساعات بتكدب يعنى العلف لسه رخيص والتقاوى موجوده والاشغال متوفره هو طبعا بيسرقوا العلف والملح كالعاده بس برده الخير كتير مصر لو اتسرقت كلها برده فيها خير
مسؤوا الوحده المحليه زارنى امبارح فى البيت طلعتله بالبيجامه الحمرا والشبشب الجديد ورغم انه سخيف وغتت حبتين لانه كان جاى يطلب رشوه لان فيه واحد من رجالتى استولى على قطعه ارض املاك دوله لكن خلى بالك انا طردته بعد ما شرب القهوه واستطعمها تمام عارف طردته ليه لانه حرامى كبير هو نفسه استولى على خمس فدادين املاك دوله
عموما انت عارف ان الحال اتغير طبعا لسه الحراميه موجودين لان زى ما انت علمتنا ان الخير موجود والشر موجود وده امر طبيعى عموما انا لازم اشوفك قريب لان الجمعيه بتاعتى الخيريه طبعا عامله رحله سياحيه من باب تشجيع السياحه طبعا وهات معاك امى العزيزه واخواتى واوعى تنسى الواد حموده اللبط هنزور الحسين ونروح الملاهى وانا جايبلك شورت عشان تنزل البحر بيه وتاكل جمبرى وتمدد رجليك وتنبسط انا عارف ان ده كان حلم عمرك وانا هحققهولك بفضل الله
الرحله يوم الخميس الجاى هتستنانى عند كوبرى ابو العلا اصل انا سبت الكوبرى بعد ما بقيت غنى وفتحت الجمعيه الخيريه فى شقه فى عماره قدام الكوبرى ولو امى رفضت تيجى معاك قول لها ان ابنك هيزعل جدا هتيجى على طول لانها زعلت منى لما عرفت انى دخلت السجن بعد ما قفشونى وانا بشحت
لكن السجن ده علمنى كتير لان تعرفت فيه على وزير سابق كل يوم جمعه بيفتحوله السجن يروح يقضى اليوم مع اولاده لانى سمعت مراته بتقول له فى التليفون (اوعى تنسى يا حبيبى عاملالك حمام محشى بالفريك)وكان راجل طيب لما رجع من العطله والفسحه ادانى لفه وقالى دى حمامه خش كلها فى الحمام انا عارف انك بتحب الحمام لما تيجى الرحله هخدك على البيت واعملك الحمام اللى بتحبه
مع السلامه يا ابى الحبيب وفى انتظارك
