دق الجرس قلتلهم اكليل مين . . . وعملت حالي ما معي بعرسك خبر
صعبت علي المسألة والحب دين. . . صليت تا ذنبي بحبك ينغفر
ودعت حلمي العاش بعيوني سنين . . . وبكيت مستقبل حياتي المنتظر
وحملت جرحي ورحت أوقفلك شبين . . . امشي معك بجنازتي بالمختصر
ولما قبال المذبح حلفت اليمين . . . وقلتي نعم والحكم بأمرك صدر
ونقلوا المحابس عالشمال من اليمين . . . وآخر أمل قدام عيني انتحر
وضويت بالديات شمعات الحنين . . .ومشيت مشي الجيش بالحرب انكسر
كنت ابتسم عا ضحك الحاضرين . . . واكتم بقلبي السر عن عين البشر
ومن بعد تقديم التهاني للقرين . . . تقدمت هنيكي بنظرات الحذر
وودع كفوفي مع كفوف الناعمين . . . بلمسة وتر مجروح بيحاكي وتر
ورجعت للتذكار مع قلبي الحزين . . . راجع قصايد قيس بليالي السهر
مطرح ما كنا للهوى ننصب كمين . . . رحت اسقي الأرض من عيني عبر
دورت عالنسيان تا قلبي يلين . . . لا نوم شاف ولا الشرود ولا السكر
وبقيو صور حبك بقلبي عايشين . . . مع كل رفة جفن لاقيلك أثر
مين بدي لوم بين الظالمين . . . . فقري , هواك , لوعتي , جور القدر
لومك إلك لابلوم الحاسدين . . . . إل فرقونا وعنك بغض النظر
وانتهت للنسيان بين العاشقين . . . بصبر أنا وأيوب من قبلي صبر
مع حردتي باقي على حبك أمين . . . بطلب من الرب اللي بفرقتنا أمر
انشالله السعادة ترافقك في كل حين . . . لكن إذا الغفران عا بالك خطر
بدك تزوري صومعة شاعر سجين . . . رح تلاقي قلب مقطوع الوريد
