حچي چــــــايخانات
شاكر الخباز
العراق
عندي أوليد...
سمــّيته د لــــع ( حـــدّ ود )
چيه هو الزغير... أو آخر العنكود..!
شاف الدنيه بتعس يوم ...
من حبل الحصار أعله العراق ألتف .
من صار المواطن .. شغلـّه بس اللف
أو من صار السره أعله الخبزه...
نوگف صــف ..!
بس .. ظلّت زلمنه أعگالها أعله الروس
مو مثل الـّلگه أبغير الوطن منـــّسف
♦♦♦♦♦♦
أو... كبر حـــــــدّود .....
بسنين الحصو اليجدح أبخبز الصاي
أو بسنين اليــّنز البيت .. من سگفه
أو بسنين اليموت الفاتحه أتشتــّمه...
ماچان السؤال... أشلون نكضي الليل..!
بس چان السؤال..... أبيا نهار أنطب..!
أو.... كبر حـــدّود
صار أوليد من ويلاد هاي الگاع ...
بيهم ... مثل نخل الفاو..
يتمالخ أمــّالخ .. ويه شرجي الريح
وينكط نده...
اللو كنص حدره أشياع..؟
أو بيهم.. مثل شاخة گيض ..
دوب الدوب يوصل مايها امن أتــّصب ..!
أو بيهم....
اللبگ أو مطــّيور..
مثل فرخ ( الططو ) الماكضه چف صايود.
مره أشتاگ يشرب چاي .....
مايدري الحصار اتخاوه ويه الخوف ..
وستكثر علينه الماي..!
أو أذكر يوم.. راح أيصيد حــــــّذاف
ماعدنه غموس اليدهن البلعوم
ولا عدنه النبيعه أو نشتري المقسوم
أولا گبــّصة تتن.. من هذا لو منذاك..!
طلعوله جماعة ( هـــات )...
او أهل الهات كثرو.. راحو أهل الهــــاك ,!
أو ظل أويه الفقاره أيدوح...
بين المدرسه المابيها بس فرّاش
أو بين التربيه – اللا تربيه او تعليم-
چيه تلگه المعلم ... يشتغل بگا ل ...
لو جندي أحتياط .. أو لو قواطع جيش
ونچــّب .. أو سكت حـــدود..؟
ظل ايراوح أبين الصفوف أسنين
لاهو..وه الصعد... ويه اليمش اجتاف....
أولاهو.. وه النهب من الحواسم ريش
بس ظل أنقه من الزاب .... أو أنصع من بياض اوجوه ذاك الصوب..!
♦♦♦♦♦♦♦
مره كضوه بالتقاطع .. لابسين اوجوه مابيها ملامح
شي أمبرگع .... شي أملـــثــّم ..
والبعض متهيئ أبوضع الرمي...؟
أمنين جاي ... أو وين رايح..؟
گال جاي أمن الولايه..
أورايح البيت اهلي .. ببيوت الحواسم..
گــا لـّه ابيوت الحواسم
صارت ابكثر الارامل ..وابعدد كلمن مهاجر ..لو مهــّجر
وأكثر امن الشهداء .. أو اعلى من تعداد كل هاي اليتامه..!
أو اكثر امن اجيوش كل ( السفرديم )....
أو كل بغايا ( اللآشكناز )
وين رايـــــــــــــح....!
مالكط حدود من كل الحچي .. بس وين رايح..راد يفلت
آنه مو من الحجــــــاز..
عمي بيت اهلي بالاصلاح الزراعي....؟
گاله أتوكل على الله .. أو گوم وللي...
أو عود سلـّملي على المابعده واعي...؟
♦♦♦♦♦♦
وبفد يوم من أيام ذاك الصيف ..
والحال الرچيچ .. أيلاوذ امن الضيف
أو احنه ابلا امان ...
أو كهــرباء......
أو مــّي
واللسان الدعي ابن الدعي أيگول ...
أكعد بالشمس لمــّن يجيك الفي
أجاني أمفرفح أو مطيــّور..؟
ها حـــــــدّود...!
هم سحبو عليك أقسام
لو فجرو عبوه أوخلّفت ايتام..!
لوگالو أرهابي او من ربع صدام..!
أو أنته أبـ ( راوه) راوي...
أو هرشك ابحچـــــام..
گال الشــــــــــام....؟
گتله اشبيها...! گال أبن الملــّوح ..عگبوه بالشام...؟
لاخيل السرجها امن ( اليمامه الزيـــّر )
ولا خلــّـــه بن عوف الگطه ابليل أينام...؟
( منخي الديو )....
چان أيطوش بالبستا ن
من شاف او سمع حدّود... دك رجله ..أنتخاله أوصاح
ماياك الا منخي الديو..
منخي الديو...
عمره أيدك بالتلاثين.... مكرود..أمن هل ميسان
لازيران قاري ...أولاكتب داران
يتنيسن ابوكت العوز ... وبسليّه وكت الصيد
لاكوط ..أو تجف .. هب ريح
ياخذها كصاص... أمن – الچباسي – أيدوح...
لمــّن ينچبس خصاف نخل الفاو.
زلمه اتحطه عد يمناك..يفزع من يطك المــــاو
أبصدره ايزيح – عشاري – ابشحيح الماي
چفــّه اللو غرف ..بعدال چف مسحـــــــــاه
بس .. ثوبه سواحل..
بيه خمس چاكات ....
لو ذبــّه أبخله...... أيعضه الچلب وايعوص..!
چيف الوكت خاين بيه.. مثلي أومثل ( أم أعبيد )
♦♦♦♦♦
حدود ..أنبهت.. من انتخاله- الديو –
معقوله الشهامه اتوّ سمت بس بيك
وقطاب السياسه أتبيع بس الهيو
من يمته القلم محـبـّرته من جلمود...؟
ووراق الكتابه أجلود ابو الحصين..؟
چابيش أنكتب تاريخ ( داحي الباب )
وشلون أنقرت.. صفحات ( ذوالنورين)
معقوله التضــّمده أگراب ...
مابيه ســـيف
وأتفاگ العشاير....
شرو بيها أطحين ...؟
أومعقوله المشاعر... لفلفاها الخوف..
وتناست الفــّزعه أبثورة العشرين...؟
چا يمته الرچايب ... تصهل أبغــداد
وتحــشــّم بلد يفزع الكوت الزين ..؟
أوچايمته الجگاير ..
تنگلب عطـــّاب ..
وتخلي – البراطم – تترك التدخين
زلاّت اللسان اتسودن السجــّان .. أسكت يالساني أهنانه ذوالقرنين..!
البحر .. يصطاد الضفاف...
عنوان القصيده السودنت .. حـدّود
بالطبگه سمعها أورد كتبها أردود
... من حلــّن بنات الجامعه..أوعبـّرن
شاركهن ( رياض) ابصوته من مشحوف..
أبأطراف العبي أوشالاتهن عمــّتن
رشــّنه أبرضاب اشفافهن بسكوت..من لفـّن عبيهن مستحه...
أو نــــــزلـّن
من عدها أنشطب ... من ربع راس أغليص
ونـّـذب أبقوائم ...... راس ....... سنحاريب
أومن ذاك الوكت...
لو لبس فروة صــــــوف
گالو تحت أبطه أيظم مخالب ذيــب.!
البحر .. يصطاد الضفاف ..
فقراء نجـــد
يسمعون نصيحة الاعراب
في فض الخصام..
بين العمومة حول حبك .
حول مانسجته أوهام الهوى... حولي..
وما غرزته في ظهري..
من الطعنات..
في صدري من اللعنات.. حول غوايتي..
وجنونك المزعوم يابن العم..!
ها..هم..كل فتيان العشيرة
يرخون من حولي الأعنــّة...
يزعمون بأنهم حولي..!
أنا... جوعى العيال ..
حصباء نجد كلها بعيون أهلي..!
ألآن.....بحر يستفيق ... ويضرب الامواج في صندوق صدري..!
أسماكه جوعى تموت بقاع قلبي
ألآن ...أضرب حائط المبكى..!
فتبتلع الحجارة كل كفي..!
آلآن ... تصرخ في دمي...
كل الثعابين التي زرعت خطاي...
أعوذمن ضوضاء حبك .. من لواعجه التي انحفرت..
على أعتاب قهري
آلأن.. أقذف صخرتي با ليــّم..
أعلن عري صبري
آلآن.. يخرج من كهوف الجوع أطفالي
مجمدة جباههمو
وفارغة عيونهمو
وأهرب منهمو ...لكن..
الى أين المــّـفر..؟
سياط أهلي.. والمفــّر... غياب أهلي..
عــوّرة حبي.....
فمن يكسوه...؟
فتيان العشيره...؟
صــمّ".. وبكـّم".. آه عمي".. كل فتيان العشيره..!
وبن الملــّوح بالفلا... يصطاد غزلان الظهيره..!
والجوع....
يافتيان كافر...
والفقر ..كفر..فأقتلوه,... يكاد..لا...
أو .... فقتلوني..!
♦♦♦♦♦
هذا البيه فلــّح ..حـدّود..؟
وين الأمسيه البيها شعر تلگاه.
يحفظ .... من قفا نبكي.....
الى.. سجـّل.. أنا عربي
ومن بغداد والشعراء والصور...
الى .. ياجارة الوادي
أومن.. أني أمرؤ.. أسم القصائد للعدا
أن القصائد شـّرها أغفالها...
أومن ... شفتك جعت ... ماچان عندي أطحين
عجــّنت أبني العزيزأوچيــّمت بخته
أو .. من..
بعد صوتك صدى أيهز الحياطين
أوخيالك بعده واكف علمنصــّه
أو على أشفافك قصيده أتغازل الموت ...
أشلون الموت.. ماينطيك فرصه
يعصــّه التنتجي أعليها المحطات ..
عليمن تنتچي.. أمن أتريد عصــّه
أو .. من
أذا أنته أو زماني أثنين ...
وثنيناتكم .. علطير تفاگه
خطيه اشما يريد أيلـــــــــوذ..
صدى الچيلات .. من كل صوب تتلاگه
لمــّن يقفــّل...
اريد أدلي أبرشاي أسواة هاي الناس
يابحر القوافي أبعاصفات النـّو
آنه موش امس عهدي ابعشرة المنظوم
ولانه أويه القوافي اتعارفت للتو
الشعر صنعت هلي وصياغتي امن اصباي
زمــّـهن ياخيالي اشما حلالك ســو
أنا اربات النده ..أو راعي الحواشي البيض
أذا والله أكتهن تسمع الهن دّ و
♦♦♦♦♦♦
وبرابع سنه أمن اسنين .... ( شعّ سنّ..طگ )..
والگارص ولانه.. أوشبـّع بينه البــّگ
وبطول اوعرض.... شگ البلاد... الشگ ..
أو ألف رحمه أعله ابوه الگا ل ..
حلاة الحگ .. هله أچواكيچ
تصعد للسمه أو تنــــــــــدگ
وهي عاده اليطك النــــــــاس
لابد يوم .......... ماينطــــگ
رحنه أنعزي ( آل جعاز )
من راح الغدر بوليدهم جنــّاز
لاگينه ربع ....شي لابده أمن الخوف...
أولاگينه اللي بيهم.. لعب علحبلين..
والمنهم چثير.. أتحطه فوك الراس
موال التقاعــــــد ... نص حچي الديوان
كل أثنين شــدّو علچلاب أسروج
من جلة الخيل البرد عاها أخليف
حته اللو يهدهن .. من يركضن عوج
والثلث البقه أيدردم... أشظل بالبيت..؟
( أشلون البيت أيظل المطره
أومطره اتصاوغ بيه)
فرهـــــود.. المدگـــدگ ....
نفض بشته ..أوگام...
ورثــّله جگاره ....أو طلع .. هز بيده
صــّرح للصحافه الما قرتها الناس.....
چذب ....
كلها چذب ..... هاي القصيده.!
شاكر الخباز
20 / رمضان/1423
تنويــــــــــــــه
1 ) شكروتقدير خاصين للشاعره الكبيره بشرى البستاني لتضمين
قصيدتها( البحر يصطاد الضفاف )
2) تقديري للساده الاصدقاء
الشعراء الذين ضمنت بعض المقاطع من قصائدهم لاعتزازي بهم
وكل يعرف ماضمنت عدا الذين يرحمهم الله
