كلام فى الهزيمة
مهزوم
وماليك فى الامر
والجمر فى اليد مزهجر
والجو ده ساخن وبيسخن
عصفورتك فى النار بتطير
بتغنى أغنية الحزن
فى جناحها قلبك مربوط
بقصايد مكتوبة بحلمك
متنتور حرفك
متشخبط
فى دماغك والليل يندهلك
فى حاراته العتمة بيواعدك
على حفلة كوابيس
يا عريس
وعروستك عـ المدى تظهرلك
وتقرب منك .. تلعب لك
فى الأصل وفى الصورة تعدل
وتبرمج منك وتهزهز
اوصالك على حبل التوهة
تتعلم منها وتتأكد
ان انت مش لازم منك
ان انت شجرة وبتطرح
الحزن الساكن جواها
مالهاش فرع يقويها
أو ثمرة تذكرها فى موتها
مالهاش غير حلم مهكع
يتلاشى بمرور العمر
مهزوم
وماليك فى الامر
ومساحة امانيك محدودة
مشروطة بوداع البنت
احلامك وملاك الوهم
إتلاشى واتلخبط كلك
فى وجودك وكيانك بعضك
وحدودك حدها هلوستك
واتلملم كونك فى جنونك
وبلادتك حطت وانتصرت
على قلبك على كل مبادئك
