صدكـَ مر الرصاص بجسمه بلا شوف
وصدكـَ شفت الرصيف إيكَوم ..
لم جرحه
لم نزفه
لم وجهه .. لكَه بوجهه غيره وراس ماطخ يوم
بس شاف الرصاص إيلوذ بالذله
يظنون الفراح لو مات ماكو أشفاف
تضحك تصنع الفرحه
ويظنون النخل لو مات إيطيح وينثني بجرحه
يقيناً لا ..
العراقي إيشيل كل الموت بعيونه
الطعم طعم الفرح والخوف
معجون بيقينه وزاده وملحه
وتوضه الشارع بدمه
شهم ماهمته الطلقات
لوجته الأدين الغادره بذبحه
شهم بيه الطباع أهواي
طيب .. ومرجله
الغيره .. أنتمائه
الليل من يغتاض بين أهله وعمامه
أيشد بعزته وصبره
العراق أيصير بحزامه
أبد مانبجي السنين ونحزن بفركَاه
كَعدنه أنعيد كل ذكراه
ويضل أسم الشهيد إيمامنه وحضره
نطحله بصبرنه أنذور
من عازة صبرنه أنصيرله الرحه
عزيز ومن تعد أزلام أول ماتعد الزين ..
لأن حط روحه رمح
ماذل يوم ..
لو باع الضمير وفرهدو رمحه
كاظم الفضلي
