هجرة غير شرعية بقلم :نجلاء نصير

هجرة غيرشرعية
_عرفية_
صرخ الشباب وقالوا
يا خلق عايزين نعيش
نتخرج كده من الجامعة
وشغل منلاقيش
*******
نقف في طابور
طويل عريض
علشان رغيف العيش
********
ولوروحنا مستشفي أميرية
يبخلوا علينا بالادوية
حجتهم نقص في الكمية
********
بالذمة دي مسرحية هزلية
ولا طابور الجمعية
أو ورقة في مصلحة حكومية
********
لازم تمشي أمورك
تقل جيوبك يا عنيي
وإلا حاجتك مش مقضية
بالذمة دي مش تبقي
قضية
أدفع وأخد حقي!!!
******ومنين أجيب ؟!!
وأنا شاب هزيل
نـَفسي مقطوع من الفاقة والجوع
******
لقيت ناس بتقول
في هجرة غير شرعية
قلت يعني عرفية
ضحكوا يا اخوننا عليا
وقالوا
تقل جيبك يا عنيي
******
روحت علي دواري
وقلت لأم عيالي
اديني الصيغة دهية
ولما أسافر
راح أجيبلك منها مية
وأنتي ياأما اديني معاشك
علشان ألحق السفرية
هجرة _إيه _غير شرعية
******
ردت أمي عليًوقالت
سيبك يا ابني من العرفية
قلت لها يا أما أنا تعبان
جوه بلادي عايش جعان
مش لاقي حق الأدوية
يارتني ما دخلت كلية
واتعلمت لي يا أمل صنعة
أحسن من وجع دماغ الجامعة
********
ردت وفية وقالت
حتسبني لمين ده أنا ولية
قلتلها رب العلمين يحميك
أنا حاطط كل ثقتي فيك
صرخت وفية وقالت
من غيرك أنا مش قوية
آكلها معاك بملح
ولا تمشي يا غالي عليّ
******
قلتلها الملح غالي عليّ
ياأم عيالي
أستني أبيع لحمي يا ولية
لتجار الأعضاء البشرية
سيبيني أشق طريقي
البحر حيبقي صديقي
هجرة ياناس غيؤشرعية
يعني إن مت مليش ديّة

يمكن تنجح العرفية
ونقب علي وش المية
مش طمعان في جاه وقصور
أنا بحلم أعيش مستور
وما حدش يبيع ويشتري فيّ
*******
سيبيني ياأما وادعي لي
أوصل وأعيش بحرية
والله إن صابت السفرية
عشتك ياأما حتبقي هنية
وإن مت غريق يا وفية
أمانة ماتبكوا عليّ
أنا حبقي شهيد العيشة ديّ
والي في بطنك ياوفية
أمانة ما يدخل كلية
علميه صنعة احسن له
وقولي له
أبوك كان نفسه يوفر لك
عيشة هنية

يا ابني أبوك مات ضحية
ناس في صورة عصابة مخفية

دي مشكلة مش فرعية دي واسعة ومنتلية...
***
مااعذبك وانت تطرحين مشكلة منتشرة ولم ننته منها ولاندري ماذا بعد...
تحيتي

السلام عليكم
يااختي ماكتبته مؤلم ونعيشه كل يوم...
لك الشكر والاحترام لفكر منير ومضيئ
عبد الرحمن

اقتباس:

---

المشاركة الأصلية كتبت بواسطة ريمه الخاني

دي مشكلة مش فرعية دي واسعة ومنتلية...
***
مااعذبك وانت تطرحين مشكلة منتشرة ولم ننته منها ولاندري ماذا بعد...
تحيتي

---

الاخت الراقية الغالية :ريما الخاني
أشكرك كثيرا
علي مرورك العطر