مقابلة مصورة مع الدكتور الربيعة ::(شبكة المعالي)

http://forum.ma3ali.net/upload/File/1163727104.gif

المؤتمر العلمي الإقليمي للموهبة



والذي أقيم في

مدينة جدة


في شهر شعبان الماضي


كان الدكتور :


عبد الله الربيعة
http://www.alriyadh.com:81/2006/02/10/img/102779.jpg


لديه ورقة عمل رائعة

كان الحضور فيها ممتاز

بعد ورقة العمل تقدمنا إلى الدكتور وطلبنا منه جلسة استفسارية حوارية

حول الطب والدراسة وحياته الشخصية وطموحاته وتمؤلاته

ووالله لقد وجدنا منه كل احترام وتقدير


فجزاه الله خير الجزاء


http://www.conjoinedtwins.med.sa/pre...ay/images/Dr_R

http://www.conjoinedtwins.med.sa/images/05012005a.jpg

روابط التحميل


http://forum.ma3ali.net/upload/File/1163724089.gif





http://forum.ma3ali.net/upload/File/1163724336.gif






http://forum.ma3ali.net/upload/File/1163724345.gif

النص كتابة
إلى كل من أراد المقابلة نصية هذا ما طلبتم
وخاصة للأستاذ : سهيل المطيري
بسم الله الرحمن الرحيم
شبكة المعالي الإسلامية
تقدم
مقابلة مع الدكتور /
عبد الله الربيعة
- مقدمة تعريفية بالدكتور عبد الله الربيعة :
معالي الدكتور /
عبد الله بن عبد العزيز الربيعة
استشاري جراحة أطفال
والمدير العام التنفيذي لشئون الصحية بالحرس الوطني
ورئس قسم العلوم الصحية بجامعة الملك سعود
ذاع صيته عالميا لخبراته وإنجازاته العملية
خاصة في عمليات فصل التوائم المتلاصقة
وقد أجرا أكثر من 34 عملية في هذا المجال
وهو أيضا معروف في بخبراته في أمراض البنكرياس لدى الأطفال الرضع
كتب الدكتور الربيعه العديد من أوراق العمل وقدمها إلى مجلات عالمية دوليه
كما حضر العديد من اللقاءات العملية الدولية كمتحدث رسمي
وهو عضو في العديد من المجالس الوطنية والدولية
تلقى الدكتور عبد الله الربيعه العديد من الجوائز الوطنية والعالمية وميداليات استحقاق بسبب إبداعاته العلمية وتفانيه في تقديم خدمات صحية إنسانية
قال الدكتور عبد الله الربيعة :
الانتقال من الثانوي للجامعة لا بد أن تعرف أنها نقله كبيرة في حياتك فمرحلة الثانوي مناهج كثيرة متعددة مختلفة إلى تركيز في تخصص معين سواء كان الطب أو أي تخصص أخر ،
طبعا الطب في بدايته كثير من الطلبة يصابون بصدمه في السنة الأولى !!!
لإنها نقله كبيرة وخصوصا الجيل الجديد لإن التعليم تغير عن أول فصار لما تنتقل من الثانوية للجامعة راح تصاب بخيبة أمل وراح تقول إني بفشل وتقول أني ما افهم طبعا لأسباب كثيرة وحده منها اللغة !
تتعلم من عربي للغة إنجليزية فماذا تفعل في هذه المرحلة أول شي يجب انك ما تيأس ،
ولابد أنك تعرف ان الطب و العلاقات الاجتماعية مع زملاك وأصحابك واللي تسهر معهم بتقل ما أقول إنها بتصير صفر لكن بتقل سبعين إلى ثمانين بالمية ولازم تقبل هذه الحياة ،
الشيء الثاني اللغة يجب أنك تثابر في تعلم اللغة ولا فيه أحسن من الكتاب يساعدك في تعلم اللغة وترجم وتقرأ حتى تنمي قدرتك في اللغة ، بعد كذا لما تدخل المراحل العلمية – كثير من الطلبة يحفظ !! وهذا غلط ويقولوا إن الطب حفظ الطب مو حفظ يمكن أنا من الناس اللي ما اهتم بالحفظ أبدا هي فهم واستيعاب
كيف تستوعب الشيء فيه طبعا أشياء بتحفظها مثلا في التشريح والأشياء اللي زي هذا هذي أشياء أساسية ولكن كيف تربطها مع بعض هذا الطبيب المبدع أنك تربط الأشياء مع بعض هذي اعتقد انه هو سر النجاح .
...................................
طبعا لما تتكلم عن التخصص أنا ما أقول صر جراح أو لا تصير جراح أنا اعتقد فكر في حياتك ، أكثر الناس حينما يختار يجب أن يختار تخصص يعرف حياته أنا عندي ولدي توه مخلص الطب جاء سألني قلت له منب قايل لك وش تدخل لكن أعرف التخصصات مثلا فيه تخصصات تعني طول حياتك وأنت في المستشفى حتى وأنت استشاري ما تقول أنا استشاري ممكن تجي بالليل ينادونك الساعة 3 الفجر في الشتاء في الصيف ! ، وفيه تخصصات أقل فأنت أعرف حياة الطبيب المتخصص معه وش نوعها وأختر تخصصك إذا تعجبك حياة عبد الله الربيعه مو حياته اللي تشوفه في التلفزيون لكن حياته اللي في الواقع شفها كيف هو عايش يمكن أربع أيام ما يشوف عياله يمكن ما يشوف زوجته أربعة أيام هذي هي مثلا بعض تخصصات الجراحة زي جراحة الأطفال وجراحة القلب وجراحة الأعصاب فيها تعب جسماني كبير جدا وفيها أيضا متابعه فإذا انك اخترت التخصص أبدأ ركز على التخصص كيف تركز؟
أولا الجراحة لابد يكون عندك موهبة للجراحة لإنها فن وعلم بنفس الوقت يعني الجراح يقول لناس بس كيف تسوي لا مو كيف تسوي ! ، حنا دائما نقيم الجراح باتخاذ القرار ، يمكن كونك تقول ما اقدر أسوي العملية هو أفضل من أنك تسويها فهذه القدرة هي التي تميز الجراح الناجح عن غيره .
........................................ ...
طبعا لما تبدأ في التخصص لابد من المتابعة للجديد لابد أن تعرف أن الطب ما فيه منهج معين مهب كتاب نصوص تقراه وخلاص لا الطب مجلات وأبحاث كل يوم فيه تغيير دائما يمكن أكلمك الآن وفيه بحث طلع فهي تتغير وتجدد المعلومات فكان أول شي شف الجراحة كيف في عشر سنوات تغيرت شف الباطنة شف الأدوية وغيرها فهذا شي مهم فيه المتابعة طبعا كونك تصير باحث أو عدمه هذي ميولات هل أنت بتطلع طبيب بس يعمل في المستشفى ؟ أو هل أنت بتطلع طبيب معلم ؟ عندك القدرة على التدريس؟ هل أنت طبيب باحث تقول والله بشتغل في الطب وفي نفس الوقت بكتب ابحاث وبنشر في مجالات ؟
فكل وحده لها توجهها والجمع بينها صعب ولا هو سهل ويحتاج إلى جهد طبعا الجهد كبير ولا هو صعب لكن على حساب زوجتك وعيالك هذا شي لازم تحطه في بالك واختم كلامي بأن النجاح مهب صعب بس يبغى طموح يبغى مثابرة يبغى جهد ..
س/هل هناك أهداف لك حققتها في المهنة الطبية ؟
أكيد فيه أهداف تحققت وفيه أهداف يطمح الواحد انها تتحقق طبعا أنا عندي عمل فني جراحي وعندي عمل إداري وعندي عمل بحثي يمكن اللي كنت أتمناه أني أسوي أبحاث أكثر لان عندي ميول بحثية لكن وقتي ما يسمح لي فانا ما عاد اكتب أبحاثي إلا في الإجازات مع عيالي أسوي فيها أبحاثي كنت أطمح أكتب أكثر فما هو كل شي طمحت له حققته بالنسبة للجراحة حققت صحيح ولله الحمد جزء كبير من طموحي ولكن المشوار ما ينتهي لكن الحمد لله إن الواحد وصل طموحه انه ما عاد نرسل المرضى في تخصصنا والحمد لله صرنا ما نرسل ونجري العمليات هنا وأشياء كثيرة طبعا ود الواحد يحققها وده أن عنده وقت أكثر أدرس طلبة في الطب والآن ما عاد باستطاعتي إني أدرس لان ما عندي وقت احك راسي فدائما حط عندك طموح وهدف أسعى له بس لا تزعل إذا ما حققته كله لإنه هذي الحياة حتى مع عيالك تبغى ولدك يصير كذا ما يصير فهي الحياة وأنا أقول إن الحياة مطاطة مرنه فزي ما نقول منهج التعليم لازم يكون مرن و أؤكد عليهم نفس الشيء أقوله في حياتنا تراها مطاطة ولكن لازم يكون عندك هدف وتسعى لهدف هذا وما تيأس .
س/ ما هي الدوافع التي تدفعك لهدف معينا ؟
في الطب واضح الهدف الطب ما يبي له ولو بسألك ليه اخترت الطب لأنك تخدم الناس فالطب دوافعك واضحة جدا لما يجيك طفل بين الحياة والموت ويا تعطيه دواء ويطيب وإلا تسوي له وهذه اعتبرها دافع كبير جدا وتفرح كثير ، مع إن رجليك ما تمشي لك عشرين ساعة في الجراحين تسوي عملية أو انك في العيادة وكل واحد سبك وشتمك لكن مريض ابتسم لك و طاب هذي تسوى الدنيا ، و أنبه ألا تكون دوافعك ماليه وتخيل لو نبغى الفلوس ما قعدت مع اهلي اقولكم صدق وأنا طبيب فلا تحط دوافعك كلها ماديه .
س/ لكن يا دكتور بالنسبة لتخصص المخ والأعصاب هل هو يعتبر من أصعب التخصصات وهل عملياته تعتبر من أصعب العمليات ؟
خلني اقولك شي فيه كثير من الناس يقولون انه ما فيه شي اسمه أصعب التخصصات ، كل شي ما تتخصص فيه صعب وكل شي تدخله يعتبر سهل ،فلو الحين تجي تسال جراح أعصاب عن القلب قال لك القلب صعب فالمسألة هي انه هل أنت تميل لها التخصص وإذا دخلت فيه وتعمقت فيه واكتسبت فيه خبره صار سهل وكما يقول الغربيين صار ( bread and butter) بمعنى : خبز وزبدة.
فمثلا لو أقولك سو شاهي و أنت ما تعرف بتقول صعب خمس ست مرات وبيصير سهل عليك نفس الشيء الطب فالواحد قعد له سنوات ودرس وتخصص وصار استشاري وأصبح إجراء العملية بالنسبة له سهل فمثلا أول ما تبدأ التشريح تقول كيف بشوف التشريح ؟ وهذه بدايتنا يوم كنا طلبه زيك وفي أعماركم وبعد شهرين تشرح وأنت تاكل سندوتش !!
فهي المسألة على التعود فإذا تعودت على الشيء وقرأت وتعمقت فيه صار سهل فمثلا الرياضيات تلقى المسألة صعبة وإذا درست القوانين وحليتها جو زملائك يسألونك وشلون حليتها بتقول والله لأني درستها ! .
ما فيه شي صعب بالحياة ولا فيه شي اسمه مستحيل فكل شي ممكن تحقيقه إذا أنت سعيت له وثابرت لتحقيقه نجحت فيه ،
إلا إذا والله انك تبي تنام وتسهر في الليل . يعني لا تتوقع انك بتمشي ، وخلوني أكون صادق وصريح معكم الطب ما فيه راحة من تدخله إلى ما تروح للقبر ، خلني أكون واضح معكم الطب ما فيه راحة اللي يبغى الراحة لا يدخل الطب بالذات الطب متعب جدا مرهق فيه سهر وفيه تعب وأنا أتكلم عن اللي يبغى راحة البيت و البدن ويبغى يتغدى مع عياله ويتعشى مع عياله هذا يدور له تخصص آخر غير الطب !!!
س/ لكن هو يعمل فيه احتساب واجر يستفيد منه ؟
ايه نعم لكن أنا أقول إن الواحد لا ينظر انه يقول بدرس الطب واخلص وأتخصص وارتاح ما فيه راحة أنا لو تسأل عيالي وتقول لهم أبوكم هل كان أفضل يوم انه يدرس وإلا الان يوم تخصص قالوا لك لا ليته يرجع يدرس لأنهم الان ما عاد يشوفوني ! .
طيب يا دكتور الإطلاع الطبي إذا ما قرا الطبيب يوميا على الأقل ربع ساعة في تخصصه يتسبب في خطأ طبي هل لابد من الإطلاع المكثف ؟
ما أقول يوميا لكن قد تقرا آخر الأسبوع ولكن لابد أن تكون متابع في تخصصه وليس بشكل يومي ، لكن يجب أن تتابع ما استجد في علمك لإن العلم دائما صعب تلم به ما لم تتابع ، طبعا في تخصصك لو تسألني الان وتقول لي وش الجديد في تخصص القلب قلت لك ما اعرف لأني ما اقدر الم بكل شي ، ففي المكتبة الطبية أكثر من 1500 مجلة مشهورة تطلع كل شهر فتصور هل تقدر تقراها كلها وكل مجلة فيها 200 صفحه !
طيب يا دكتور جديد العلم التطبيقي كيف يتم متابعته ؟
والجديد هل أنا اكتشفته أو أحد غيري أكتشفه إذا أكتشفه غيري أناقش الرجل هذا أتصل به أو ربما أدعيه يجي لي أو أروح له أما إذا أنا مكتشفه طبعا أطبقه طبعا انتم بتشوفونها في الدراسة أنه تطبق في المختبر وتطبق على الحيوان وإذا نجحت تطبق على الإنسان بعد موافقته طبعا لجان متعددة وموافقة المريض .
انتهى اللقاء ،،
شكر خاص للدكتور عبد الله الربيعة على هذه المقابلة الرائعة وجزاه الله خيراً .
لمن أراد تحميل اللقاء على هيئة ملف وورد :
http://forum.ma3ali.net/upload/File/1164833559.rar
قام بإجراء اللقاء :
د/ المعتصم
مشرف الإعلام المقروء
قام بتفريغ اللقاء :
بحر الأحزان
مشرف الطب والصحة
شكراً جزيلاً له

جزاك الله خيرا

جزاك الله خيرا

الدكتور عبدالله الربيعه من أشهر أطباء الجراحه

خصوصا في مسألة فصل التوائم

و لا ننسى الكادر الطبي معه لأنه متخصص أيضا

و أذكر أن الملك عبدالله قام بتوجيه

الدكتور عبدالله الربيعة وهم في زيارة للتوأم البولندي

و الذي سبق أن أجريت لهم جراحة فصل في السعودية

بأن يفصل توأم سيامي سعودي موجود في المدينة المنوره

ثم بعد تلك العملية و المتابعة و التي نجحت و لله الحمد

تم توجيهه لفصل توأم طفيلي في مدينة بيشه بالسعودية