حزن سياب ..
تلكين بيه اشارات الصليب
ومأذنه
وايمام ملت منه زواره
وتلكين بيه وطن ..
وحزن سياب
بايك عمره واشعاره
وبيه صبر كطب الرحه ..
الشايل قحط جوعان بكتاره
وتدور السنطه وي بالي
وتتشابهه جثير وجوه
بس وكت النمره وادمه احجاره
العليه البيه مو مبهم
ولاغربه ..
ولابيه صنم مامرته الشاره
ولاطبع الفرح سلعه
وتبوك
الناس
بعياره
لجن مجتول عازة موت
ضاكت عين خطاره
الدرب بس من مستحاه ملني
ولكيت اشمكثر اعذاره ...
وصدك تلكين شدهت بال
بس مامش صدك وزمور غداره
وتظنين السفر ميزان ..
رحلة موت ..
تابوت المنايه انسان مسماره
وعدي صدر بس همج ايشيله
ولو بيه الهموم اتبات محتاره
وتلكين بجروحي جسر ..
وبعضي نهر وجهج غسل اسراره
ورق صار الدمع بس من ورق
وكلوب مثل الخشب ..
مذبوح منشاره
اولو بس العيون اتفرهد النظرات
طبع وادم فضول وماتصح جاره
وتلوذ الجلمه غركانه ..
نسيت اسمي عله اوراقي
طفل شفته يفر براسي فراره
وابرر ..
واعتذر ..
واندم ..
لجن طبعج قديم ايطالب بثاره
كاظم الفضلي
