بكرا النق وبكرا النق!!!

بالفرح بالزعل....منق
وقت بنكره ولما منحب ....منق
لما منكون فاضيين أو حتى مشغولين.....منق
صبح ومسا وكل شي عنا بينتسى إلا النق
بالجد وبالمزح.....منق

::: جذور النق :::

الشاب السوري (شباب وصبايا) منين بيجيبوا هالنق
؟!؟!؟
باختصار بجيب النق من بيت أبوه حبيبي......لا عن
جد عم أحكي ما عم أمزح
فنحن جيل اعتاد على التربية النقاقة....
قوم فيق صارت الساعة ستة
تعال اتغدى
جاي جاي
يلا قوم اتغدى
جاي بس دقيقتين
يلا تعال اتغدى....قوم اتغدى هلأ بيبرد الأكل
قوم اتغدى يلا....

وفي السهرة :
تعال تعشا ما تغديت منيح لأنك...
تعال تعشى...ما بدك تتعشى...يلا قوم ع
العشا....


::: حكاية نق :::

في سنة البكالوريا: إيمتى بدي خلص وفوت ع الجامعة بقا

(( وبيضل بينق وينق وبينسى يدرس.....))

في السنة الأولى للجامعة:

أووف شو عم حن لأيام المدرسة...إيمتى بدي أتخرج يالله
هف لسه كم سنة افف

بعد التخرج :

ييي شو مشتاق لرفقاتي بالجامعة وكيف كنا....

افف يا ريتنا ما تخرجنا ضاق خلقي من النوم للضهر
والطلعات والفرجة ع التلفزيون بدي اشتغل واستقر

بعد الشغل :
تضرب هالحياة من البيت للشغل وبعدين بتحكيلك كم تلفون
وبتحط راسك وبتنام لتفيق ع الشغل...شو هالعيشة افف
والله شي بملل...حياة بتقصر العمر

خطب بنت بحبها:

افف إيمتى بدنا نتزوج ونكون مع بعض لوحدنا...
أتجوزوا
افف من هالروتين والله شي بملل شو رأيك نجيب ولد
صار الشب أبو العيال:
لك شو هالبلوة بدي ضل عم زق غراض متل الحمار...
افف ع هالعيشة يرحم أيام كنا راسين....وقت كنا مو
فاضيين غير للحب
::: جاي على بالي نق :::
صار النق في حياتنا حالة طبيعية اعتيادية وعفوية....
فمن دون أن نقصد ننق
فإذا التقت فتاة بشاب وأحببته وبدأ روميو زمانه يعمل رجال
عليها ويبلش يسألها وين رايحة منين جاية وينق إذا لبست هيك
أو إذا ضحكت هيك أو إذا قالت هيك....
هنا تبدأ الفتاة بدورها الهام وتقوم بالنق على رأسه
( أنا هيك..أنت عم تشك فيني..شو مافي ثقة..أنت
عم تحكم على علاقتنا بالنهاية إذا بدك تضل غيور..وعلى
إيهي إيهي )
ومن كتر نق جوليت على رأس روميو...يقرر روميو
يطنش ويعطيها حريتها
وما هي إلا أيام حتى تعود جولييت إلى نقها ولكن بطريقة
مختلفة
ليش ما عم تسأل علي....تأخرت اليوم ليش ما دقيتلي
تطمن عليي....ما شفته كيف كان عم يطلع
فيني....أجاني ميس كول من رقم غريب وما حاولت
تعرف مين صاحب الرقم..شو شايفة ما عاد فرقت معك إذا
لبست هالتنورة...))

قلي فهمني شو بدك !!؟!!!

::: نقاق شرقي :::
شاب شرقي نقاق :
أنا بدي امرأة مثقفة ارتبط فيها تفهم عليي شو بحكي وتناقشني
فيه ويكون عندها وجهة نظرها يلي تدافع عنها
(( بعد ثلاثة اشهر فقط ))
الشاب شرقي النقاق :
طلعتلي روحي بضل حاطة راسها بالكتاب...لا بهمها طبخ
ولا نفخ...بعدين بضل عم تجادلني...وعلى وجهة
نظري ووجهة نظرك هديك المرة لسختها كف طيرتلها وجهها
كله مو بس وجهة نظرها...افف أن بدي وحدة حنونة
تسايرني

((بعد شهرين فقط من زواجه من الحنونة))
الشاب شرقي النقاق :
قرفتني حياتي دايماً بالمطبخ وشو ما قلتلها بتقول حاضر.
كيف بدها تربي ولادي على هالشخصية الانهزامية لا بتهش
ولا بتنش وحتى لما طلقتها بكيت شوي وما حكيت معي ولا
كلمة يا زلمة.....
لك أنا بدي وحدة حلوة ست بتفهم بالاتيكيت....
الشاب شرقي النقاق :
افف يا زلمة هلكتني بمصاريف اللبس والمكياج تبعها
هالمفزلكة يخرب بيتها شو فاضية ما في ولا مرة قرأت شي
كتاب وشو ما بتحاكيها بتقلك ما بعرف وشو يعني....

(( لك أنا ما بقدر غير عيش مع وحدة مثقفة يا زلمة ))

ويستمر الشاب شرقي النقاق بالنق إلى أن يأخذ الله أمانته

::: شعب بنق ليوم النق :::

والشعب السوري بشكل عام نقااااااااااااااااق ......
نحنا على طول بنقول شوف أوربا ما أحلا شوارعها
شوف العالم شلون.....شوف شوف السير عندهم
شوف النظافة....
شوف........أي شفت
ما نحن هون بالبلد لما فرض وضع حزام الأمان للسائقين
قومنا الدنيا وما قعدناها وصرنا نق ونسق
والله بدفع الغرامة وما بحط الحزام...شو بدهون يتحكموا
فينا
وقال شو بدهون يقلدوا بلاد برا قال

آآآآآآآآآآآآآآآآيـــــــه سكتنا ما عاد نق...
هلأ دوركون لتنقواااااااااااااااااااااااا....
منقوووووووول