رمضان كريم
رمضان كريم يا شعرا
وانتم طيبين
إيه رأيكم لو قلنا
حبة كلام حلوين
****
ننقع حروف القصايد
خشاف للصايمين
مدام غلوا الياميش
بَشرْ وزبيب وتين
حتي الهوا والميَّه
والعيش وقمر الدين
*****
يبقي فطارنا كلام
دعا ابتهال تايبين
أما السحور تهجُدْ
حبة بكا نادمين
نغسل قلوبنا القاسية
عملت ف غفلتها
حبة ذنوب وخطايا
ناسينها ومش فاكرين
****
إيه رأيكم يا شعرا
نصوم ونفطر سوا
ونكتب قصايد دعا
ولا انتم مش ناويين ؟
*****
اللي ناوي معانا
من أول لشهر الكريم
يرفع إيديه للسما
يدعي معانا ربنا
ويطلب من مولانا
يهدينا والسامعين
واللي مكسوف
من ذنوبه
اللِّي ماشية ف ضِله
ماهو الشيطان ضله
ف خطايا بالملايين
يقول ورانا ف سره
لا00لا 00 يجهر بسره
بصوت عالي آمـين
